Reforzar el cai de Llastres costará 4,5 millones, un 50% más

La Conseyería entamó en febreru de 2023 les obres pa reforzar la protección frente a les foles

La reforma estructural del dique del cai de Llastres, en Colunga, costará a la fin unos 4,5 millones d’euros, cuasi un 50 por cientu más de lo previsto nel contratu robláu va dos años con Dragados al camudar nel proyectu inicial pa dar solución a los furacos y anomalíes detectaes más tarde na base del rompefoles.

"El centru del cambéu ye la reforma estructural del dique y de la solera, y con él garantízase l’interés públicu, que ye acabar la obra", aseguró esti martes el conseyeru de Movilidá, Cooperación Local y Xestión d’Emerxencies, Alejandro Calvo, que compareció énte la Xunta Xeneral pa dar esplicaciones sobre esti proyectu y el retrasu qu’acumula.

La Conseyería entamó en febreru de 2023 les obres pa reforzar la protección frente a les foles del dique del cai de Llastres mediante la colocación de cuasi 400 bloques de formigón d’ente 40 y 60 tonelaes, un proyectu con un costu previstu de 3,17 millones d’euros qu’agora va medrar en 1,3 millones, más IVA.