Un xulgáu abre dilixencies pola amuesa d'una virxe 'queer' en Xixón nel 8M

Abogados Cristianos interpunxo esta selmana una denuncia ante los xulgaos de Xixón

El Xulgáu d'Instrucción númberu 4 de Xixón alcordó abrir dilixencies por un posible delitu de discriminación tres la denuncia presentada por Abogados Cristianos escontra los organizadores de la manifestación pol 8M en Xixón na que s'amosó una Virxe de Cuadonga 'queer'.

La organización interpunxo esta selmana una denuncia ante los xulgaos de Xixón al entender que "la procesión anticristiana" de la 'Santina Queer' podría constituyir un delitu d'odiu y otru escontra los sentimientos relixosos. 

La maxistrada-xuez señala nun autu que los fechos denunciaos "faen presumir la posible esistencia de delitu de discriminación" y que, al nun tar afitada la natura, circunstancies y persones qu'intervinieron, hai que recoyer dilixencies previes.