El Principáu defende que va mirar pola calidá de les universidaes privaes que quieran instalase

Peláez critica que Madrid autorice universidaes privaes "escontra criterios técnicos"

El Gobiernu asturianu señaló esti miércoles que’l so modelu ye "opuestu" al de la Comunidá de Madrid, que "estrangula financieramente" a les universidaes públiques y autoriza l'apertura d'iniciatives privaes "escontra criterios técnicos".

Asina lo aseguró'l voceru del Executivu autonómicu y conseyeru de Facienda, Guillermo Peláez, en respuesta a dos preguntes plantegaes polos grupos parlamentarios de PP y Vox sobre la implantación na comunidá d'universidaes privaes nuna comisión de la Xunta Xeneral del Principáu.

Peláez esplicó que, nestos momentos, tres l'interés de la Universidá Europea de recalar n'Asturies y de l’Antonio Nebrija d'abrir un centru adscritu na comunidá, hai dos procedimientos alministrativos "entamaos y en trámite".