Medren un 9,4% les quexes unviaes dende Asturies al Defensor del Pueblu

L'alministración de xusticia, el trabayu y la seguridá social enllenen les más de les quexes

El Defensor del Pueblu recibió l'añu pasáu 581 quexes vinientes d'Asturies: un 9,4% más qu'en 2023. Tán venceyaes sobre manera cola alministración de xusticia, el trabayu y la seguridá social, según el so informe añal.

La institución tamién recibió dende la nuestra comunidá cuestiones venceyaes a asuntos mediuambientales y polítiques d'asilu y migración.

Ángel Gabilondo destaca qu'unvió l'añu pasáu a 33 ayuntamientos españoles, ente ellos el de Xixón, recomendaciones pol so retrasu nel inxerimientu de les zones de baxes emisiones, y recuerda que la llei obligaba a afitales enantes de xineru de 2023 en toles poblaciones de más de 50.000 habitantes.