L'Hospital de Cangas abre una consulta pal estudiu del equilibriu

La integración del serviciu va dexar amenorgar esperes y ufiertar un diagnósticu más certeru

El Serviciu d'Otorrinolaringoloxía del Hospital Carmen y Severo Ochoa de Cangas, centru de cabecera del área sanitaria II, punxo en marcha una consulta específica de pruebes vestibulares pal estudiu del equilibriu.

Esti nuevu serviciu ufiértase tres la compra d'una unidá de videu informatizada, compacta y portátil, formada por unes cámares, un xiroscopiu y un procesador dixital que dexen la detección de los movimientos oculares en respuesta a los desplazamientos de la cabeza, en tres exes espaciales.

Conocíu como 'Video Head Impulse Test' (vHIT), esti equipu apurre información sobro l'estáu funcional del reflexu vestíbulu-ocular (un sistema neurolóxicu esencial que dexa caltener la visión nítida cuando se faen movimientos rápidos de la cabeza) y cuantificar los daños, si los hubiera.

Anguaño ye'l sistema instrumental más usáu por especialistes n'otorrinolaringoloxía y neuroloxía nes unidaes especializaes del estudiu del vértigu.

Hasta agora, estes consultes namás taben disponibles nel Principáu nel Hospital Universitariu Central d'Asturies (HUCA), San Agustín y Cabueñes.

El centru de referencia del suroccidente incorpora asina una prueba que dexa afitar si'l sistema vestibular ta en bon estáu o ta alteriáu, lo que resulta esencial cuando'l paciente va a consulta tres sufrir mareos, vértigu, cayíes o desequilibriu.