Saavedra afirma que la esclusividaá na sanidá "va siguir" cola nueva llei de salú

Ta reforzándose'l centru de salú p'atender la demanda asistencial de L.luarca

La conseyera de Salú asegura que se ta reforzando'l centru de salú p'atender la demanda asistencial nel centru de salú de L.luarca. Concepción Saavedra niega que'l centru cerrara por falta de personal como dixo esta mañana na Xunta'l PP.

La conseyera de Salú, Concepción Saavedra, afirmó esti xueves na Xunta Xeneral que n'Asturies hai esclusividá pa los puestos directivos y mandos intermedios, "daqué que va siguir" cola nueva llei que va regular esi conflictu d'intereses pa "dexar clares les riegles de xuegu".

Asina lo dixo na Comisión de Salú del parlamentu autonómicu na contestación a una entruga de Foro sobro si tien previsto amenorgar el salariu de los médicos que compaxinen la so actividá nel Sespa con una actividá por cuenta propia.

"Otra cuestión", apuntó ye que los médicos que tán compatibilizando l'actividá pública y privada tengan qu'arrenunciar a un complementu específicu.

Pa Saavedra, la idea ye qu'esa diferencia económica, la “mayor" de toa España, puea "regulase y averase más a lo que socede n'otres comunidaes autónomes".

El Principáu tamién trabaya pa implementar midíes que faigan posible que la compatibilidá "seya pa toles categoríes profesionales".

A xuiciu de Saavedra, "claramente" hai una cuestión ideolóxica, "pero tamién empresarial".

La esixencia de la esclusividá "nun ye única" del sistema de salú, alvirtió la conseyera, que señala que l'oxetivu ye "siguir trabayando pa qu'haya esclusividá", y qu'Asturies tenga "interés" pa los profesionales.

"Ye cierto qu'hebo casos y qu'esa compatibilidá dio llugar a situaciones de conflictu d'intereses", anque “la mayor parte" de los profesionales "siguen el rigor nel so trabayu".

Cola idea de "fidelizar" a los profesionales sanitarios, sorrayó que'l Principáu va siguir col procesu d'oposiciones en 2025 y 2026, y qu’a partir de setiembre del presente añu va volvese a negociar el modelu de carrera y desenvolvimientu profesional.

Nos dos años de l'actual llexislatura, el Sespa "yá cumplió dos de los sos oxetivos prioritarios", la temporalidá estabilizando a más de 4.000 profesionales y la meyora de condiciones llaborales, lo que fai que n'Asturies "haya una bon redolada llaboral y seya d’interés pa los profesionales".

El diputáu del Grupu Mistu Adrián Pumares amosó "esmolición" y nun ve "tolerable" que se trate de “semar duldes" sobro los profesionales que compatibilicen l'actividá nel sector públicu y priváu, “al marxe” de cuestiones ideolóxiques.