La Nebrija ve razonable que'l Gobiernu endureza los requisitos pa nuevos centros

La universidá nun descarta habilitar una residencia pa estudiantes n'Avilés

Güei conocimos más detalles del nuevu decretu de centros universitarios, col que’l gobiernu quier llendar la medría de centros privaos. Por exemplu, l’executivu plantega anular les autorizaciones daes a les universidades que nun cumplan con 4.500 alumnos y alumnes nos cinco primeros años d’exerciciu o nun destinen un 5% del so presupuestu total a investigación.

Amás, tienen que cuntar con un 50% de doctores pal total d’enseñances sobre la totalidá de la plantiya de profesoráu o garantizar, nel tercer añu d’actividá académica, l’agospiu a estudiantes equivalente al 10% de les places d’enseñances de grau.

Son dalgunes de les midíes qu’afecten tanto a les universidaes nueves como a les existentes.

La Universidá Nebrija, que s’afitará n’Avilés, ve razonable que’l Gobiernu endureza los requisitos pa nuevos centros

Universidaes privaes como la Nebrija, con años d’actividá, ven bien que’l Gobiernu endureza los requisitos p’abrir nuevos centros privaos. Creen que tanto les universidaes privaes como les públiques tendríen que cumplir con altos estándares de calidá.

La Nebrija lleva 40 años con actividá y anguaño tien 15.000 alumnos y alumnes. Creen que la calidá de la enseñanza, el nivel d’investigación o los númberos de graos tendríen que ser requisitos esixibles tanto a la enseñanza pública como a la privada. Afirma que les comunidaes autónomes tienen sistemes rigurosos de verificación del cumplimientu por parte de los centros.

El centru tará pronto n’Avilés col so grau d’Enfermería. Enagora, y ensin poner plazos, tán trabayando nel espediente pa cumplir coles esixencies plantegaes dende’l Principáu.

Una vegada s’afiten, nun descarten poder habilitar una residencia pal agospiu de los sos alumnos y alumnes.