Siguen les quexes de los beneficiarios del bonu social térmicu

La Conseyería asegura que ta dada la orde pa pagar los espedientes

Siguen les quexes de los beneficiarios del bonu social térmicu, que lleven ensin recibilu dende l'añu 2022. Más de 101.000 espedientes n'Asturies tán pendientes de ser pagaos dende esi añu hasta l'actualidá. La Conseyería de Derechos Sociales asegura que'l llunes yá dio la orde pa empecipiar los pagos de 35.500 d'esos espedientes.

Ángeles Silva, vecina de Xixón, ye una de les 45.293 persones beneficiaries de los más de 100.000 espedientes a los que correspuende l'ayuda del bonu social térmicu nos años 2022, 2023 y 2024. Silva llama toles selmanes a la Conseyería pa pidir información. L'ayuda ta destinada a compensar gastos d'enerxía en consumidores vulnerables. Pa ella recibila ye indispensable.

La Conseyería de Derechos Sociales señala que'l llunes 31 de marzu yá se tán faciendo los pagos, que se van dir executando les próximes selmanes. Les quexes llegaron a CCOO, que tamién pidió esplicaciones.

Según la Dirección Xeneral de Xestión de Derechos Sociales esti trimestre executaríase'l pagu de 35.500 espedientes. D'ellos, 16.000 son del bonu de 2023 y más de 19.000 del bonu de 2024. Y otros 22.000 van pagase nel segundu trimestre del añu.

Entá quedaríen pendientes otros 13.000 más a los que se-yos tán pidiendo datos.

La idea ye qu'a final d'añu tean abonaos toos.