Denuncien por presuntes irregularidaes a Mina Miura, de los mesmos propietarios que Zarréu

Promining alerta de la existencia d'una esplotación soterraña "fantasma" en Tormaleo  

Promining, empresa venceyada al anterior dueñu de la mina de Zarréu, l’empresariu lleonés Victorino Alonso, presentó esti xueves énte la Fiscalía d’Asturies una nueva denuncia na qu’alerta de la existencia d’una esplotación soterraña "pantasma" en Tormaleo (Ibias) asitiada na contornada de la denomada Mina Miura.

D’esta mina ye titular Carbones La Vega, empresa perteneciente al mesmu entramáu societariu de Blue Solving, sociedá con llicencies pa operar na mina de Zarréu, na que’l 31 de marzu pasáu un españíu acabó cola vida de cinco trabayadores y mancó a cuatro más.

Según el denunciante, en Tormaleo esa empresa namás tien llicencia d’esplotación soterraña en Mina Miura, pero too apunta a que "nun se saca yá carbón d’esa zona" porque nun tien medios y cinta pa la estracción del mineral, pero que sí podría tar faciéndolo n’otra esplotación soterraña "pantasma", amás d’a cielu abiertu.