ArcelorMittal da anuncia de nueves paraes n’Avilés pola cayida de pidíos

Axúntense al ERTE de siete díes aplicáu a 1.624 trabayadores

ArcelorMittal programará paraes en delles instalaciones del departamentu de fueya de lata de la so fábrica d’Avilés pola cayida de pidíos, nuna midida que s’axunta al Espediente de Regulación Temporal de Trabayu (ERTE) de siete díes aplicáu a 1.624 trabayadores de la xornada normal, según informaron fontes de la siderúrxica.

Les paraes afectarán al Decaáu, el llunes viniente, 14 de xineru; al Tandem 2 (del 13 al 15 de xineru, dambos inclusive); Llimpieza Electrolítica y Recocíu de Contino (del 15 al 18 de xineru, dambos inclusive); Tamper (el 16 y el 17 de xineru); LH2 (del 16 al 20 de xineru, dambos inclusive), y Calidá (del 15 al 17 de xineru, dambos incluyíos), informa la empresa.

El pasáu 26 d’avientu, ArcelorMittal daba anuncia de l’aplicación d’un ERTE de siete díes a 1.624 trabayadores de la xornada normal pola "incertidume económica" provocada por dellos condicionantes.

L’ERTE aplicaráse concretamente los díes 18 y 25 de xineru, el 1 y el 15 de febreru y el 1, el 15 y el 29 de marzu.

Les causes dicen que son l’altu nivel d’importaciones na XE, como la xuba sustancial d’aceru viniente de Turquía, y la baxada de demanda del sector del automóvil.