La Fundación Princesa d'Asturies va anovar un terciu de los sos xuraos cada añu

Unes 30 personalidaes van sustituyir a los miembros que llevaben más tiempu
La Fundación Princesa d'Asturies va empecipiar esti añu l'anovación de los xuraos de los galardones que concede cada añu cola sustitución d'un terciu de los sos miembros, lo que nesta edición va traducise nuna trentena de cares nueves nos ocho tribunales que van fallar los premios.
Esta iniciativa respuende al alcuerdu tomáu l'añu pasáu pol Patronatu de la Fundación qu'afita un máximu de cuatro convocatories consecutives pa los miembros de los xuraos que fallen unos galardones qu'esti añu algamen la so trentena séptima edición, esplicó la directora de la institución, Teresa Sanjurjo.
Esta renovación, que se va facer cada añu, va afectar nesta edición al terciu más antiguu de los miembros, cola esceición de los premiaos n'ediciones anteriores que formen parte de los xuraos y de los patronos. L'oxetivu d'esta iniciativa ye introducir nos xuraos nuevos perfiles y puntos de vista y arriquecer los alderiques previos a los fallos de los ocho premios, pa lo que se van dir buscando especialistes en cada materia con visión internacional.
De les aproximadamente 150 persones que van formar parte de los xuraos, una trentena van ser galardonaos n'ediciones anteriores o representantes d'instituciones reconocíes colos premios; una quincena van ser estranxeros y va haber unes 40 muyeres.
La Fundación Princesa d'Asturies recibió hasta agora pa la presente edición un récord de daqué más de 300 candidatures de 54 países, anque Sanjurjo recordó que lo importante pa la institución ye la excelencia de les mesmes y non la cantidá.
Otra de les novedaes de la presente edición ye que los ocho premios fallaránse enantes del branu dempués de que nos últimos años el de la Concordia se diera nel mes de setiembre.
El primer galardón en fallase va ser el de les Artes el 4 de mayu siguíu de Comunicación y Humanidaes el 10 de mayu; Cooperación Internacional, el 17 de mayu; Deportes, el 24 de mayu; Ciencies Sociales, el 31 de mayu; Lletres, el 8 de xunu; Investigación Científica y Técnica, el 14 de xunu, y Concordia, el 21 de xunu.
Según el reglamentu de la Fundación, los galardones tán destinaos "a premiar el llabor científicu, técnicu, cultural, social y humanitariu fechu por persones, instituciones, grupos de persones o d'instituciones nel ámbitu internacional".
Les candidatures han de "ser de la máxima exemplaridá y la obra o aportación de los candidatos tien que tener reconocida trescendencia internacional".
Ente los remitentes de les candidatures tán universidaes, instituciones académiques y culturales, centros d'investigación internacionales, embaxadores d'España, representantes del cuerpu diplomáticu acreitáu n'España y galardonaos n'anteriores ediciones.
L'actu d'entrega de los Premios Princesa d'Asturies va celebrase, como ye tradicional, n'ochobre nel Teatru Campoamor d'Uviéu, nuna solemne ceremonia presidida polos Reis.
Cada Premiu Princesa d'Asturies ta dotáu cola reproducción d'una escultura de Joan Miró -símbolu representativu del galardón-, la cantidá en metálico de 50.000 euros, un diploma y una insinia.
L'añu pasáu fueron galardonaos Núria Espert (Artes); James Nachtwey (Comunicación y Humanidaes); Mary Beard (Ciencies Sociales); Hugh Herr (Investigación Científica y Técnica); Javier Gómez Noya (Deportes); Richard Ford (Lletres); la Convención Marco de Naciones Xuníes sobre'l Cambéu Climáticu y l'Alcuerdu de París (Cooperación Internacional) y Aldeas Infantiles SOS (Concordia).