Webcams
Buscar
A Veiga, la historia d’un conceyu marcáu poles riaes
La curva poblacional camudó y en 2019, foi’l que más habitantes ganó nel Principáu
A Veiga algama la so independencia en1834. Nesi momentu conviértese en conceyu. Entama a construyise l’Ayuntamientu, y en 1854, la ilesia, anque’l nome oficial nun llegaría hasta 1916.
Nesi añu, el Boletín Oficial de la Provincia facía desapaecer el topónimu 'Vega de Ribadeo', n’usu dende’l sieglu XV, pa dar pasu al d’A Veiga.
En 1969, escribiéronse páxines mui importantes de la historia del conceyu. Les riaes d’esi añu arrasaron la villa y la contornada. Un 13 de setiembre los ríos xubieron, llevando per delantre la Casa de Cultura y llenando de barru toles cais.
La historia volvería a repetise años dempués. En 2008, los ríos Monxardín y Suarón xubiríen otra vuelta arrasando prácticamente tol centru la villa, repitiéndose tamién en 2010, anque esa vegada les riaes mataríen a dos vecinos.
La población del conceyu foi menos col pasu les décades, pero la curva camudó. En 2019, A Veiga ganó 60 habitantes, el que más n’Asturies.
La población total asítiase nos 3.926 vecinos, pero ye cuasi la metá de los qu’había na segunda metá del sieglu XIX, cuando llegaron a rexistrase cuasi 7.500 persones.
A Veiga mira pal futuru centráu en caltener la so población y n’algamar llibrar unu de los grandes males de conceyos vecinos, la fuga d’habitantes.
