Acaba n'Asiegu l'alcuentru d'Aldegues del sieglu XXI
![Concluye en Asiegu el encuentro de Aldeas del siglo XXI](https://www.rtpa.es/fotos//22/05/20220506140658_RTPA2089126.jpg)
Portugal apuesta pola diversificación económica pa desenvolver les aldegues
La puesta’l ramu al I Alcuentru d'Aldegues del sieglu XXI consistió nuna visita guiada a Asiegu, en Cabrales, empezando nel mirador Pedro Udaondo, un equipamientu públicu resultáu de la concentración parcelaria, usada nesta aldega pensada como una ferramienta d'ordenación del territoriu.
Ente los participantes, xunto a representantes d'Asturies, Galicia, Cantabria y Portugal, la secretaria lusa d'Estáu de Desenvolvimientu Rexonal, que sorrayó la importancia de la diversificación económica con cuenta de desenvolver les aldegues, nun país qu'apostó pol so desenvolvimientu en rede.
Al sur de Portugal, nel Algarve, onde lleven más de 20 años trabayando pol futuru de les aldegues, hai proyectos d'ésitu amestaos a l'actualización de les actividaes artesanales o d'emprendimientu, a partir de productos locales pa ellaborar barrines enerxétiques.
El futuru de les aldegues del sieglu XXI pasa tamién por evitar la so sangría demográfica, un problema compartíu por tolos participantes y nello tán n'Asiegu, con más d'una decena de neños de menos de 13 años, cuando fai más d'una década nun había nengunu.
Esti I Alcuentru d'Aldegues del sieglu XXI va tener nueves ediciones nel futuru, como aseguró Jaime Izquierdo. El Comisionáu pal Retu Demográficu afirmó que'l futuru de les comunidaes llabradores pasa por ganar población y amestar nueves actividaes económiques, pero siempres calteniendo les actividaes agropecuaries, fundamentales pa xestionar el paisaxe.