Activada l'aplicación móvil pa siguir l'escrutiniu de les autonómiques

Martínez garantizó que'l sistema va dar les "máximes" garantíes de seguridá

Los ciudadanos asturianos puen descargar dende esti vienres l'aplicación gratuita pa dispositivos móviles habilitada pol Gobiernu rexonal pa siguir el recuentu de los votos de les elecciones autonómiques del próximu domingu.

L'aplicación pa teléfonos intelixentes y tabletes qu'usen IOS y Android va ufiertar información de candidatures, participación y resultaos del escrutiniu provisional de los comicios.

Amás d'esta aplicación, el Gobiernu d'Asturies va poner en serviciu la web www.resultadoselecciones2019.asturias.es, que va apurrir un serviciu de consulta en tiempu real en distintos niveles: comunidá, circunscripción y conceyu.

El conseyeru de Presidencia, Guillermo Martínez, visitó esti vienres el centru d'espardimientu de datos, allugáu nel Palaciu Conde Toreno, n'Uviéu, pa supervisar los últimos detalles del dispositivu afitáu pa espublizar l'escrutiniu.

Martínez garantizó que'l sistema va dar les "máximes" garantíes de seguridá y va ufiertar "la mayor tresparencia posible" p'asoleyar los primeros resultaos electorales "cuanto enantes".

El conseyeru recordó que'l recuentu de los comicios al Parlamentu Européu va llevase alantre'l primeru, polo que los datos del escrutiniu de les autonómiques van apurrise más tarde de lo que se fixo nos comicios celebraos en 2015.

Sicasí, desplicó que, tres el zarru de los colexos, van entamar a apurrise los primeros datos nos dispositivos d'espardimientu.