Adrián Barbón anima a lluchar pola Asturies de la igualdá real

El presidente animó a enllenar les redes sociales de reivindicaciones feministes

El presidente del Principáu, Adrián Barbón, animó esti llunes a enllenar les redes sociales con reivindicaciones feministes por mor de la conmemoración del Día Internacional de la Muyer y afondó en que "la meyor Asturies necesita más impulsu feminista".

"Esti 8 de marzu, el Gobiernu del Principáu anímavos a siguir la vuestra llucha por una Asturies feminista, pola meyor Asturies: la de la igualdá real", afirmó’l presidente nun mensaxe grabáu y espardíu peles redes sociales nel qu’asume qu’esta vegada comparte les sos reivindicaciones al traviés de les nueves tecnoloxíes porque la pandemia obligó a que la celebración del 8M tenga que ser distinta.

La delegada del Gobiernu n’Asturies, Delia Losa, afirmó esti llunes que pal Executivu de Pedro Sánchez "tolos díes son 8 de marzu" porque "la causa de les muyeres ye la causa de tola humanidá".