Alberto Castro y la so primer obra 'Bandeira Moura' escrita en gallego-asturianu

El naviegu esfruta de la so primer publicación mientres piensa nel so trabayu viniente

El protagonista del día forma parte de la nueva xeneración de autores en gallego-asturianu. El naviegu Alberto Castro, qu’acaba de ver asoleyada la so primer obra: 'Bandeira Moura'.

'Bandeira Moura' ye’l cuentu col qu’Alberto Castro ganó en 2021 el Primer Premiu 'Quiastolita' de Lliteratura Infantil del 'Parque Histórico del Navia'. Recién asoleyada yá ta nes biblioteques de les escueles y conceyos de la contornada. Tamién pue lleese na web del 'Parque Histórico del Navia'.

La obra ye l’últimu averamientu d’esti maestru al gallego-asturianu. Llingua na qu’entamó a escribir va una década pa, de dalgún mou diz, saldar la delda moral col idioma que-y abrió les puertes de la docencia. Dende entós suma yá delles publicaciones en recopilatorios o en revistes como 'Trabatel'. Anque nun ye mui optimista col futuru del gallego-asturianu.

Alberto Castro forma parte d’una nueva xeneración d’escritores qu'apuesten por caltener una de les señes d’identidá más xenuines del occidente d’Asturies.

Inxertu na presentación del so llibru, Alberto Castro piensa yá nel so trabayu viniente. Siempres en gallego-asturianu, una llingua de cuentu.