Alcoa propón entamar los despidos el 15 de xineru ensin garantía de reversión

Los sindicatos consideren la midida "intolerable dafechu"

Alcoa punxo enriba la mesa de negociación del espediente d’estinción de trabayu una propuesta que los sindicatos consideraron "intolerable dafechu" porque supondría que’l15 de xineru viniente roblaríense los despidos de más de dos tercios de la plantiya d’Avilés "ensin nengún tipu de garantía de poder revertilos y coartando a los trabayadores a una defensa llegal".

Según el comité d’empresa, la propuesta d’Alcoa ye qu’enantes del 15 xineru tien qu’haber alcuerdu y pide’l compromisu de los representantes de los trabayadores pa que nun haya demandes colectives nel procesu y haya unanimidá nel alcuerdu.

Propón tamién, siempre según el comité d’empresa, caltener operatives les fundiciones d’Avilés y A Coruña más la torre de pasta d’A Coruña, y trabayu pa unos 200 trabayadores.

"Como condición, exíxese un cese ordenáu de les cubes d’electrólisis pa la posibilidá de rearranque pa un terceru hasta’l 30 de xunu; de nun haber tal rearranque, procederíase a la demolición de les series", apunta’l comité d’empresa.

Esiste’l compromisu por parte d’Alcoa d’abrir un periodu de venta activa hasta’l 30 de xunu d’esti añu.

Dende’l cese de l’actividá n’electrólisis, el personal afectáu sedría incluyíu nun ERTE coles condiciones de los despidos yá pactaos a la robla del hipotéticu alcuerdu, suxetu a validación del Ministeriu de Trabayu y basáu na búsqueda de posibles inversores pa les plantes.

Les condiciones sociales afectaríen a les persones que yá nun perteneceríen a Alcoa si dempués del 30 xunu nun hai inversor.

Como plan social, Alcoa ufierta prexubilaciones, recolocaciones esternes y meyora d’indemnizaciones y el comité d’empresa desplica qu’al personal temporal se-y aplicaría la mesma indemnización alcordada.