Alimerka pide desconvocar la fuelga pa volver a entamar la negociación colos sindicatos

Asegura que los paros causaron un perxuiciu a los veceros y a los balances d'unes empreses debilitaes

Falten solo ocho hores pa que vuelva entamar la fuelga nos supermercaos. Si nun hai dalguna meyora, dende les 22:00 los 12.000 trabayadores del sector tán llamaos a esta fuelga pa meyorar les sos condiciones llaborales.

Alimerka, presidenta de la patronal, pidió güei nun comunicáu que se desconvoque pa recuperar la normalidá y abrir les negociaciones.

La compañía considera desproporcionada la duración de la fuelga y poco responsable poles feches; poro, considera un pasu imprescindible y necesario la so desconvocatoria pa sentase a negociar.

Alimerka, que representa un terciu del comerciu minorista n'Asturies y preside la patronal, aborda la posibilidá de falar de meyores, pero nun contempla les dos estorbises que motivaron esta fuelga: los ascensos de categoría por antigüedá y el cómputu de les poses como xornada de trabayu.

La compañía asegura que la fuelga causó un dañu a miles de veceros y un perxuiciu a los balances d'unes empreses debilitaes pola situación económica y la crisis demográfica asturiana.

La empresa tamién recuerda que'l siguimientu de la fuelga foi decreciente, según les sos cifres, y el pasáu miércoles namás la siguieron un 6% de la  so plantiya.

La Xunión de Consumidores tamién fizo un llamamientu a dambes partes.