Altos directivos de Vesuvius aconceyen con representantes del Ministeriu d'Industria

Concentración de los trabayadores en llugares emblemáticos escontra'l pieslle de la factoría

Los trabayadores de Vesuvius concentráronse esta mañana en cuatro llugares emblemáticos d'Asturies escontra'l pieslle de la factoría en Llangréu.

Con camiseta naranxa y pancarta colocáronse frente a La Catedral d'Uviéu, al 'Elogio del Horizonte' en Xixón, la Basílica de Cuadonga o'l Centru Niemeyer d'Avilés.

Los trabayadores de Vesuvius y les sos families quieren llevar asina per toa Asturies la so llucha escontra'l pieslle y el despidu de 111 trabayadores. Mañana manifestaránse en Llangréu.

Per otru llau, los altos directivos de Vesuvius tán güei en Madrid. A primer hora tuvieron una xunta con representantes del Ministeriu d'Industria.

Según pudo saber TPA Noticies, ye un alcuentru de "segundu nivel" ensin la presencia de la ministra nin de nengún secretariu xeneral.

Un alcuentru solicitáu pol Gobiernu pa pidir a la multinacional que se replantee la so decisión d'acabar cola producción n'Asturies.

A estes hores los directivos de Vesuvius tán estudiando'l posicionamientu que tendrán mañana na so xunta colos sindicatos dientro del periodu de consultes.