Ana González va defender allugar la estación intermodal en Moreda

Tocante al financiamientu, considera que la opción preferente sigue siendo'l Bancu Européu d'Inversiones

L'alcaldesa de Xixón, Ana González, apuesta por tomar decisiones pa "blindar" la construcción de la nueva estación intermodal y tres analizar les distintes propuestes na xunta del conseyu d'alministración de Xixón al Norte (XAN) afitada pa esti miércoles va defender allugala en Moreda.

El conseyu d'alministración de Xixón al Norte axunta esti miércoles p'abordar les últimes novedaes sobre'l proyectu d'integración del ferrocarril y la construcción de la intermodal pa lo que Ministeriu, Adif y Conceyu trabayaben dende febreru nuna propuesta pa reutilizar la estación provisional de Sanz Crespo y otra pa construyir la instalación en Moreda.

Tres axuntase con tolos conseyeros de la corporación en Xixón al Norte (Cs, PP y IX), Ana González afirmó qu'una vez analizaes dambes iniciatives l'equipu de gobiernu refuga la opción de Sanz Crespo y tien claro que'l “meyor allugamientu” ye Moreda, polo que, como conseyera, va defender esa propuesta na cita del miércoles.

Según esplicó en declaraciones a los periodistes, Sanz Crespo supondría un menor costu pero implicaría caltener la sablera de víes, lo que dexa menguar menos la fienda esistente ente Moreda y Laviada.

Amás, el Ministeriu unvió al Conceyu un informe nel que refuga reutilizar la estación provisional de Sanz Crespo porque la necesidá de faer un estudiu informativu y ambiental allargaría la tramitación.

Tocante al financiamientu, el gobiernu local considera que la opción preferente sigue siendo'l Bancu Européu d'Inversiones (BEI), pero pa ello va pidir un estudiu de viabilidá económica, financiera, social, demográfica, de sostenibilidá medioambiental y desenvolvimientu urbanísticu de la ciudá.