Ángel García, unu de los mayores productores de faba d’Asturies

El so enfotu ayudó a camudar el conceptu de faba n’Arbón

Con daqué más de 20 años, Ángel García decidió dar un xiru a la so vida. Decidió dexar a un llau la esplotación láctea familiar pa dedicase de forma profesional a la producción de faba, afición qu’heredó de so madre.

El so enfotu ayudó a camudar el conceptu de faba n’Arbón, pasando de les pequeñes plantaciones destinaes pal autoconsumu, a les grandes estensiones que güei inunden bona parte del pueblu.

Tarrenes colos qu’algamó una producción media añal de 10 tonelaes. Nun va muncho pudo presumir de la collecha más grande d’Asturies en Villayón.

Pol so asitiamientu, nes vegues d’El Río Navia, la faba d’Arbón ye de les más renomaes y demandaes pola so calidá. Tanto que, hasta güei, Ángel foi capaz de vender tola so producción. El so destín, les empreses de la IXP Faba d’Asturies, de la que forma parte dende la so creación.

El so trabayu ye un procesu duru qu'esixe un gran trabayu. La so salida, esta temporada, tienlu en vilu énte la crisis sanitaria que punxo en dificultaes a unu de los principales demandantes d’esti productu, el sector hosteleru.

Una torga que, de xuru, nun podrá con Ángel, capaz de tresformar los primeros conseyos maternos nuna forma de vida.