Apaecen los primeros restos nes dos fueses comunes de Parasimón

L'antropólogu forense Franciso Etxeberria espera recuperar a unes 20 vícitimes

Los primeros restos de la fuesa de Parasimón nel Puertu Payares entamaron a recuperase esta mañana.

Ellí un equipu empobináu pol antropólogu forense Franciso Etxeberría trabaya nuna de les fueses alcontraes y na que se llevaron alantre numberoses investigaciones nesti tiempu en base al testimoniu y a la memoria d'un vecín de la zona.

Los familiares de Luis Cienfuegos, unu de los represaliaos nesti puntu, impulsen la exhumación gracies al sofitu económicu por mor d'una campaña de micro mecenalgu n'Internet.

L'equipu de la Sociedá de Ciencies Aranzadi lleva alantre estos trabayos de forma voluntaria. Ye'l culmen d'un proyectu a llargu plazu, que va rematar nel llaboratoriu cola identificación de los restos.

Na fuesa númberu 1 de Parasimón tiense constancia de polo menos la presencia de 10 cuerpos. Equí les investigaciones y los testimonios constaron qu'alumnos de la escuela procedieron al enterramientu de los asesinaos.

Los fechos fueron ente'l 6 y el 9 de payares de 1937. A los deteníos dixéron-yos que diben camín del Penal de San Marcos de Lleón pero les sos vides quedaron atayaes poco dempués de pasar el pueblu de Payares.