Arcelor presenta'l fornu eléctricu

Arcelor asegura que nun se dan les condiciones pa confirmar la inversión del DRI

Arcelor entama les obres de construcción del fornu eléctricu de Xixón. Un pasu decisivu na descarbonización de la producción d'aceru n'Asturies y n'Europa.

Los dirixentes de la multinacional nel continente tuvieron presentes nel descubrimientu d'un finxu que reflexa l'entamu d'estos trabayos y aseguraron que'l fornu eléctricu va reforzar la competitividá de la planta asturiana.

La inversión pa esta instalación xube a 200 millones d'euros. L'oxetivu ye llograr una acería moderna, más competitiva, que va producir 1,1 millón de tonelaes d'aceru al añu, va dexar que seya autosuficiente pa suministrar a los trenes d'alambrón y carril.

Sanjay Samaddar, CEO d'ArcelorMittal Europa de Productos Llargos, apunta los oxetivos: seguridá, menos xente en planta, más robótica, automatización y Intelixencia Artificial.... Y tamién l'oxetivu medioambiental, amenorgar les emisiones de CO2 hasta un 22%.

Ye'l primer pasu de la descarbonización d'Arcelor n'Europa. Una revolución, el cambéu del paradigma de la siderurxa tres 50 años de funcionamientu. L'ésitu pasa, según la compañía, pola conocencia nel sector de la plantiya, l'I+D y l'enfotu de los veceros; y too, siendo rentable p'Arcelor.

La compañía sigue ensin iguar la incertidume sobre'l DRI, la planta d'amenorgamientu directu de material de fierro n'Asturies, que remataría'l procesu de producción d'aceru verde. Arcelor asegura que nun se dan les condiciones pol preciu de la enerxía ente otres coses.

Principáu y Gobiernu central consideren indispensable esa inversión.