Asiegu invertirá’l dineru del premiu al Pueblu Exemplar na construcción de la plaza mirador Dionisio Viejo Bueno

Los vecinos busquen financiación pa completar l’actuación

Nel pueblu cabraliegu d’Asiegu, distinguíu l’añu pasáu col premiu al Pueblu Exemplar d’Asturies, los sos vecinos decidieron destinar los 25.000 euros del premiu a la construcción de la plaza mirador Dionisio Viejo Bueno.

El llugar ta asitiáu nunos tarrenes donaos en 2002 pola familia d’un vecín del pueblu qu’emigró a Méxicu a entamos del sieglu XX.

Dempués d’esa decisión, agora lo que toca ye buscar financiación pa completar esa actuación, llargamente esperada n’Asiegu.

Los vecinos pidieron sofitu al Ayuntamientu de Cabrales, dende onde se ve con mui bonos güeyos.