Asturies, a la espera del picu de calor

Espérase superar los 37 graos n'El Cordal Cantábricu, Los Picos d'Europa y suroccidente del Principáu

La cuarta fola de calor del branu que punxo esti sábadu a diez comunidaes autónomes n’alerta naranxa nun se dexará notar n’Asturies hasta mañana, domingu. Una xornada na que sí s’esperen superar los 37 graos en zones d’El Cordal Cantábricu, Los Picos d’Europa y suroccidente del Principáu, y los 35 na zona central.

Según les previsiones de l’Axencia Estatal de Meteoroloxía, los picos de calor daránse ente les 13:00 y les 21:00 hores, sobre manera nos fondos de los valles d’El Cordal Cantábricu, Los Picos d’Europa y suroccidente asturianu, con temperatures que puen llegar a algamar los 39 graos en Cangas del Narcea, que fadrán que s’active l’alerta naranxa por altes temperatures.

Mientres que nos valles mineros y la zona central les temperatures rondarán los 35 graos, como en Llangréu, onde se piensa algamar los 36 graos, dos más que n’Uviéu.

Na costa, onde s’esperen intervalos de ñubes baxes y borrina, los termómetros asitiaránse al rodiu de los 30 graos, nel casu de Xixón, Avilés o Llanes, y nun llegarán a ellos na costa occidental, onde se piensa que’l mercuriu nun pase de los 27 graos en llugares como Navia.

La calor dirá acompañada de ñubes d’evolución que puen provocar dalguna tormenta ocasional y chubascos espardíos.