Asturies evalúa la so capacidá de respuesta a la crisis humanitaria n'Ucraína

"Asturies siempres foi solidaria y nesti momentu nun va cambiar"

Asturies empezó a evaluar la so capacidá de respuesta a la crisis humanitaria provocada pola invasión rusa d'Ucraína, un conflictu que provocó yá l'éxodu d'unes 874.000 persones, anque se valora que'l númberu de refuxaos va poder superar los cuatro millones pa los que la Xunión Europea trabaya yá nun plan pa entamar la so acoyida.

L'Executivu asturianu, la Delegación del Gobiernu, la Federación de Conceyos, los tres conceyos más poblaos -Xixón, Uviéu y Avilés- y les ongs Accem y Cruz Roja tuvieron esti miércoles una primer toma de contactu pa poner de mancomún los datos sobre la capacidá d'acoyida de la rexón una vez que se dea a España'l cupu de refuxaos que-y correspuenda.

Con una población de 525 ucraínos residentes n'Asturies, el procesu va ser asemeyáu al lleváu alantre p'acoyer a los afganos que fuxeron del so país tres la toma del poder por parte del réxime talibán, una crisis humanitaria que se saldó con 96 refuxaos acoyíos nel Principáu -39 d'ellos menores- en centros y cases d'Accem y Cruz Roja, principalmente n'Uviéu, Xixón y Avilés.

"Asturies siempres foi solidaria y nesti momentu nun va cambiar", apuntó al acabu de la xunta, presidida pol xefe del Executivu, Adrián Barbón, la conseyera de Presidencia, Rita Camblor, qu'afitó que'l Principáu ta a la espera de que la XE y el Gobiernu central ufierten cifres sobre'l númberu de refuxaos que van llegar a España y de la so posterior distribución.​