Asturies llanza una campaña de sensibilización énte la siniestralidá llaboral

'Querémoste de vuelta' apuesta por estremar les midíes de procuru pa evitar accidentes

El Gobiernu del Principáu, la Inspección de Trabayu, FADE, CCOO y UXT punxeron en marcha la campaña 'Querémoste de vuelta' pa sensibilizar a la población del aumentu de la siniestralidá llaboral, que solo ente los meses de xineru y agostu cobró 14 vides, el doble qu'en tol pasáu añu.

El conseyeru d'Industria, Enrique Fernández, presentó esti llunes la campaña cabo la directora del Institutu Asturianu de Prevención de Riesgos Llaborales, Miryam Hernández, la responsable de prevención de riesgos llaborales de la patronal, Leticia Bilbao, la directora provincial de la Inspección de Trabayu y Seguridá Social, Adelia García, y los representantes de CCOO y UXT Gerardo Argüelles y Nerea Monroy, respectivamente.

Con un presupuestu de 50.000 euros, la campaña va facese per un mes al traviés del espardimientu de cartelería y vídeos nos medios de comunicación y les redes sociales nos que se va afondar na necesidá d'estremar les midíes de procuru y vixilancia pa evitar accidentes.​