Asturies recibe 33,6 millones pa 12 proyectos industriales

Maroto afirma que l'estatutu pa la industria electrointensiva ta yá peracabáu

Asturies va recibir 33,6 millones d'euros del Programa de Sofitu a la Inversión Industrial Productiva (Reindus) que se van repartir cuatro empreses aniciaes en Xixón, otres tres de Llanera, dos d'Uviéu, y una d'Avilés, Mieres y Navia.

Son pequeñes y medianes empreses del campu de l'agroalimentación, la fabricación de PVC, aluminiu, amortiguadores y celulosa, que van recibir ayuda pa la meyora tecnolóxica, modernización o ampliación de la so capacidá productiva.

Esti programa de reindustrialización y fortalecimientu de la competitividá industrial ta dotáu con 400 millones d'euros a nivel nacional y tien como oxetivu xenerar empléu y desarrollu nel sector.

L'anunciu fízolu esti martes la ministra d'Industria, Comerciu y Turismu en funciones, Reyes Maroto, tres l'alcuentru que caltuvo n'Uviéu col presidente del Principáu, Adrián Barbón, enantes de visitar la Feria Internacional de Muestres d'Asturies y de facer un percorríu per Avilés.

La ministra reconoció tamién que los datos turísticos d'Asturies "son mui bonos" no tocante a pernoctaciones y visitantes y amosóse convencida de qu'esti sector sigue teniendo enforma potencial nel Principáu, onde "tien que ser palanca de creación de bayura y empléu" y convertise, xunto a la industria, en clave pa facer frente al declive demográficu.

Esta mañana dixo que'l borrador del estatutu pa les electrointensives solo ta pendiente de la formación del nuevu gobiernu pa la so aprobación, y sobre l'arancel medioambiental pa protexer la industria dixo que'l Gobiernu espunxo la so urxencia énte la XE.