Asturies rinde homenaxe a la so hestoria

Nel actu diose puxu a los valores del diálogu, la capacidá de superación y la tradición

El presidente del Principáu, Adrián Barbón, reconoció güei énte parte de los ocho integrantes de la comisión que fai 40 años encargóse de redactar l'Estatutu d'Autonomía del Principáu que llegó'l momentu de llevar alantre la so reforma parcial p'adaptalu a la realidá de los nuesos díes, una xera que, según sorrayó, va facese col mesmu enfotu nel diálogu col qu'ellos lo encararon entós.

La directora de Salú Pública de la Organización Mundial de la Salú (OMS), la llangreana María Neira, y el Club de Guisanderes d'Asturies tamién recibieron güei esta distinción na so categoría de plata nun actu celebráu nel Hotel de la Reconquista, cola asistencia acutada de públicu de resultes de les midíes de seguridá derivaes de la covid-19 y ensin la presencia de Vox, que se desmarcó d'esta ceremonia por considerar que la redacción d'un estatutu nun puede ser motivu d'arguyu y que "el meyor estatutu d'autonomía ye'l que nun esiste".

Coincidiendo col 40 aniversariu del Estatutu d'Autonomía, decidió apurrise la Medaya d'Oru a los ocho redactores, tres d'ellos yá muertos, del primer borrador d'esta llei institucional básica pola so esencial contribución al "desenvolvimientu del procesu autonómicu" y a la constitución de la comunidá.

Según Barbón, l'actitú, intelixencia y humildá cola que llevaron alantre esos trabayos son un espeyu nel qu'agora se puen mirar ensin complexos toles fuerces parlamentaries agora p'abordar una reforma que, según aseguro'l xefe del Executivu asturianu, va facese darréu y va traer cambeos que dexen meyorar la protección de la llingua.

Pa Bernardo Fernández, que faló en nome de tolos premiaos, esta Medaya d'Oru supón un pagu a un llabor colectivu, "una obra que perpasa con muncho'l so trabayu", porque nél hai munches más conocencies de les qu'amosaronron los ocho qu'integraron esta comisión.

Tocante a María Neira, el presidente autonómicu aseguró que'l so trabayu dexó faer ver que la investigación, ciencia y cooperación son "cimeros" en tiempos de pandemia como l'actual y alvertir de que la llucha escontra'l virus namás va tener ésitu si ye auténticamente global, si les vacunes lleguen hasta la más probe esquina del planeta.

La doctora María Neira González (Llangréu, 1962) recibió la Medaya de Plata "como reconocencia institucional a los sos induldables méritos directivos, asistenciales y sociales, la so rellumante trayectoria profesional y la so clara vocación humanitaria".

Tres recibir esta distinción de manes del presidente, afirmó que los dos últimos años demostraron lo vulnerable que pue ser esta sociedá y la importancia que tien la prevención, la investigación y el sofitu a la ciencia, anque tamién tuvo palabres de reconocimientu pa los platos asturianos como fonte de salú, pero ensin dexar de faer un chisgu a Les Guisanderes pa qu'amenorgue'l colesterol de la fabada.

El Club de Guisanderes d'Asturies foi tamién oxetu d'esta distinción "pol so exemplar llabor pa salvar recetes y platos escaecíos de la gastronomía rexonal y reivindicar tamién la función de les muyeres nel caltenimientu y tresmisión de la cultura gastronómica".

Esti grupu, formáu en 1997 por grandes cocineres, quier evitar que la tradición culinaria se pierda y amesta les ellaboraciones típiques tanto en cases particulares como en restauranes d'alta cocina, de la que recupera y sopelexa la hestoria de cada platu típicamente asturianu n'actos de promoción tanto dientro como fuera de la comunidá.