Asturies va tener 30 buses nocherniegos con cámara pa evitar agresiones sexuales
![Presentación del protocolo de agresiones](https://www.rtpa.es/fotos//18/09/20180918141539_agresiones180918vtr.jpg)
El Principáu va destinar 1,3 millones al protocolu escontra la violencia sexual
El Gobiernu asturianu va destinar 1,3 millones pa poner en marcha anguaño'l protocolu escontra la violencia sexual, que contempla 22 midíes de sensibilización, prevención y intervención, ente les que ta la instalación de cámares de vixilancia en 30 buses nocherniegos en zones d'ociu.
Asina, Asturies va convertise na cuarta comunidá tres Aragón, Andalucía y Cantabria en tener un programa escontra les violencies sexistes, tanto les agresiones sexuales como otres formes de vulneración de la llibertá y indemnidá sexual de les muyeres.
El protocolu foi presentáu güei pol conseyeru de Presidencia y Participación Ciudadana, Guillermo Martínez, que recordó que n'Asturies ente 2014 y 2017 denunciáronse 57 violaciones, 109 agresiones sexuales y 345 abusos sexuales.
Amás, ente los meses de xineru a xunu d'esti añu denunciáronse 103 delitos escontra la llibertá sexual, de los que 8 yeren por violación y los 95 restantes por acosu, abusu o agresión sexual.
El documentu, ellaboráu en collaboración cola Universidá d'Uviéu, va dexar articular una ferramienta de "coordinación y meyora d'atención" a les víctimes p'abordar de manera integral les violencies sexuales escontra les muyeres, según Martínez.
El protocolu enmárcase dientro de les actuaciones asumíes nel Pactu Social escontra la violencia sobre les muyeres y que'l Gobiernu asturianu comprométese a impulsar al traviés del Observatoriu escontra la Violencia de Xéneru.
El Principáu va llevar alantre, en collaboración col Consorciu de Tresportes d'Asturies (CTA) una campaña de sensibilización ente los usuarios de los autobuses nocherniegos que van tar retulaos y va impartise formación a los profesionales.
Esa partida va tar dotada con 400.000 euros procedentes de los 2,8 millones que fueron asignaos a la comunidá autónoma nel marcu del Pactu d'Estáu escontra la violencia de xéneru.
Tamién se van reforzar les iniciatives con campañes nos centros educativos al traviés d'una partida económica de 450.000 euros.
El conseyeru anunció amás que va caltener contactos cola Federación Asturiana de Conceyos pal refuerzu del llabor de los Centros Asesores de la Muyer cola incorporación de profesionales especializaos na atención psicolóxica a les víctimes d'abusos y agresiones, con otra partida de 435.000 euros.
Otra de les midíes que se contemplen cinquen al espardimientu d'una campaña institucional pa que'l 25 de payares, Día Internacional de la Eliminación de la Violencia escontra la Muyer tenga como lema la llucha escontra la violencia sexual.
Les profesores de la Universidá Yolanda Fontanil y Ángeles Alcedo conseñaron que nun hai un patrón tipu a la respuesta énte una agresión sexual y esplicaron que los delitos escontra la llibertá sexual son un crime "escontra'l cuerpu y la voluntá de la persona".
Los investigadores amestaron que cualquier muyer pue ser víctima d'una agresión sexual y que suel ser avezao que l'agresor seya una persona del so círculu, a la que conoz.
Martínez recordó que'l Principáu nun entama "de cero", yá que'l protocolu interdepartamental p'ameyorar l'atención a muyeres víctimes de violencia de xéneru inclúi un capítulu específicu colos procedimientos d'actuación de los profesionales del ámbitu sanitariu énte la detección de posibles casos d'abusos sexuales y la so notificación a l'alministración de Xusticia.