Asturies ye la rexón con mayor porcentaxe de llares unipersonales

En tres de cada 10 llares asturianos vive una persona sola

Asturies sigue siendo la comunidá autónoma con mayor porcentaxe de llares unipersonales, el 29,7 por cientu, frente a la media nacional del 25,2 por cientu, según datos de la Encuesta Continua de Llares correspondiente a 2016 espublizada güei pol Institutu Nacional d'Estadística (INE).

El tamañu mediu del llar asturianu tamién ye'l más baxu del país, con 2,25 persones, frente al promediu nacional de 2,5.

El porcentaxe de llares unipersonales aumentó nel Principáu tres décimes al respective de la encuesta de 2015.

El númberu total de llares n'Asturies baxó'l pasáu añu un 0,3 por cientu, hasta 456.200, de los que 135.500, el 29,7 por cientu, son unipersonales.

Coles mesmes, nel 33,9 por cientu de los llares asturianos conviven dos persones; nel 21,8 por cientu, tres, y nel 11,5 por cientu, cuatro.

Namás nel 3 por cientu de los llares asturianos conviven cinco persones o más, lo que representa'l porcentaxe más baxu del país.

El númberu d'españoles que viven solos sigue medrando yá que los llares unipersonales volvieron aumentar l'añu pasáu en 54.100, colo que yá son más de 4,6 millones les persones qu'escueyen esta opción, esto ye, unu de cada cuatro.

El perfil d'esti colectivu correspuende a muyeres mayores, según recueyen los últimos datos de la Encuesta Continua de Llares 2016 qu'espubliza güei l'INE, que fai una radiografía de los 18.406.100 llares qu'hai n'España.

De los 4.638.300 españoles que moren solos (un 10,1 % del total de ciudadanos), la mayoría son mayores de 65 años (el 41,7 %), y dellos un 70,7 % son muyeres.

Sicasí, nel casu de les persones menores de 65 años que viven en soledá, la mayoría son homes (59 %).
En 2016, el númberu total de llares n'España creció en 59.900 (un 0,3 %) hasta sumar 18.406.100, mientres el so tamañu mediu mengua a 2,50 persones per casa.