Barbón defende’l diálogu y l’entendimientu pol progresu d’Asturies

"Nunca nun vamos ceder a qu’haya más contaxos a cambéu de menos crítiques"

El presidente del Principáu, Adrián Barbón, defendió esti martes el diálogu y l’entendimientu pol progresu d’Asturies nun tiempu "escepcional" por
mor de la crisis sanitaria del coronavirus nel que "estorben el tacticismu y les trincheres partidistes".

Asina faló nun mensaxe institucional nel Día d’Asturies, grabáu dende’l Texu de l’Alcordanza, el memorial en recuerdu de les víctimes del covid-19 asitiáu na contornada del Hospital Universitariu Central d’Asturies (HUCA).

"Sabemos que nun tenemos qu’escaeceles, que tenemos la obligación moral del recuerdu. Sabemos tamién que la meyor manera d’honrales ye asumir la responsabilidá individual de siguir lluchando", aseguró enantes de dicir que "naide que mereza ser llamáu ciudadanu pue sentise ayenu al respetu de les normes" pa lluchar escontra la pandemia.

Barbón, que tuvo un recuerdu pa los más mayores "tan vulnerables frente al virus" y la mocedá a la que pidió "ser exemplu", señaló que "salvar vides y protexer Asturies" ta "nes manes de caún, porque toos dependemos de toos".

El presidente recalcó que’l Principáu "enxamás va mirar pa otru llau" y nunca nun cederá "a qu’haya más contaxos a cambéu de menos crítiques", poro, intentará anticipase "pa tomar darréu les decisiones afayadices".​