Barbón destaca en Madrid el "atractivu" d'Asturies p'atraer inversiones

El Principáu tien la capacidá pa convertise nun gran "polu loxísticu"

El presidente del Principáu d'Asturies, Adrián Barbón, destacó esti vienres nun foru celebráu en Madrid el “atractivu" d'Asturies p'atraer inversiones, al combinar la so calidá de vida con una redolada afayadiza pa la industria y l'anovación.

Asina lo defendió nel foru 'Asturies, tierra d'oportunidaes', entamáu na capital poles Cámares de Comerciu n'Asturies, onde afitó qu'invertir n'Asturies "merez la pena" al convertise en "un territoriu de primera magnitú" nun contestu onde se compite cada vez más pol talentu y pola calidá de vida".

Barbón aprovechó'l so discursu p'avanzar la puesta en marcha de la Oficina d'Asturies en Madrid, que va sirvir como "embaxada comercial permanente" pa "promocionar" la rexón na capital y trabayar na captación d'inversiones.

Asturies tien, según el so presidente, la capacidá pa convertise nun gran "polu loxísticu" gracies al so allugamientu estratéxicu nel Corredor Atlánticu, la so gran "ufierta de suelu industrial" y la so meyorada conectividá, sofitada na "meyor ufierta de vuelos de tolos tiempos" y la llegada de l'alta velocidá ferroviaria.