Baxa la contaminación atmosférica en Xixón nel estáu d’alarma

Delles zones siguen afectaes pola actividá industrial

La contaminación atmosférica venceyada col tráficu menguó “claramente” en Xixón nel estáu d’alarma, según un informe fechu pol Ayuntamientu.

Dende los datos de les estaciones de la Rede de Control de Calidá del Aire del Principáu de la zona urbana comparáronse los valores de los contaminantes venceyaos directamente col tráficu (NO, NO2, PM10, PM2,5) colos so valores d’intensidá recoyíos nes estaciones d’aforu de tráficu nel estáu d’alarma y nos mesmos periodos de 2017, 2018 y 2019.

Sicasí, la contaminación en zones como Veriña, apunten dende esta parroquia xixonesa, tiene un orixe industrial. Esa mengua de los niveles de polución venceyaos a la baxada del tráficu rodáu ye, poro, pequeña.

La mesma situación, nesti casu venceyada a l’actividá del cai d’El Musel, vívese en barrios como’l de Pescadores.

La reclamación d’una actuación urxente na zona oeste de Xixón en materia de contaminación sigue vixente con o ensin confinamientu.