Belén Fernández rexenta 'La Marquesa de Bisuyu'

Ellabora'l patrón, escueye los materiales y encárgase de tol procesu

So una panera, que nel so día foi chigre del pueblu, ta la tienda de 'La Marquesa de Bisuyu'. Belén Fernández Collar, natural de Bisuyu, llugar de nacencia d'Alejandro Casona, llegó a l'artesanía cuasi por casualidá, fai 14 años, gracies a un cursu de branu en Xixón.

Ehí sigue hasta'l puntu de que lo qu'empezó como una afición convirtióse nel so mediu de vida. Dexó atrás el so trabayu nel sector sanitariu, y gracies al sofitu de la so familia y amigos decidióse a dar el pasu.

El so pueblu natal, foi la elección más natural y Belén, de Casa'l Marqués, volvió a los sos raigaños so la marca de la 'La Marquesa de Bisuyu'. Empezó dando a conocer los sos productos nel Centru d'Interpretación d'Alejandro Casona y va un añu montaba local propiu.

Gran parte de les ventes failes online, anque les feries y mercaos siempres son un bon escaparate.

Igua llibretes, monederos, llaveros, pulseres, fundes de gafes y los productos estrella, bolsos y mochiles, con nome propiu, porque cada modelu lleva un nome, cuasi siempres de dalgún amigu o veceru que tien unu.

Ella ellabora'l patrón, escueye los materiales y encárgase de tol procesu, totalmente manual. Bromia con que la so familia y amigos afiten que merque una máquina de coser, pero niégase a perder la esencia del trabayu a mano.

Dexámosla trabayando no que-y gusta, no que fai que se gane la vida, no que fizo que volviera a los sos raigaños en Bisuyu.