Belinda Álvarez asoleya'l so primer llibru 'La Leyenda de los Xilem'

L'artista ye renomada pola so particular fusión del vigulín y la música electrónica

Güei conocemos a Belinda Álvarez, renomada na escena ibicenca pola so particular fusión del vigulín y la música electrónica. L'artista de Cangas del Narcea, acaba d'asoleyar, amás, el so primer llibru, dedicáu al públicu infantil, nel que la música, compuesta por ella, cobra especial relevancia.

Con siete años, Belinda decidió que lo de so yera'l vigulín y darréu entamó la so formación nel Conservatoriu Cimeru d'Uviéu. Entamó entós el so gustu pola improvisación y por salir de lo clásico, siguiendo la so formación nel Conservatoriu de Madrid en creación y interpretación musical. Ellí surdieron les primeres oportunidaes pa fusionar violín y música electrónica.

Demostrando que'l vigulín pue encaxar colos soníos más electrónicos, nesti tiempu pasaron per renomaes sales de tol mundu, compaxinando'l so trabayu na islla cola collaboración con marques y eventos.

Belinda acaba d'asoleyar, amás, el so primer llibru, 'La Leyenda de los Xilem'. Una historia ambientada en Somiedu, enfocada al públicu infantil, con toques celtes y enllena de fantasía, pero que busca tamién fomentar la tolerancia y el respetu pola diversidá.

Dempués de la bona acoyida de 'La Leyenda de los Xilem' yá prepara una segunda parte, qu'espera asoleyar pa finales d'esti añu, otra vuelta acompañada de música.