Radiotelevisión del Principáu d'Asturies Radiotelevisión del Principado de Asturias
Radiotelevisión del Principado de Asturias
RTPA - Radiotelevisión del Principado de Asturias
Fuente: RTPA, 12 de febreru. 2019 16:17

Cangas del Narcea pierde la metá de población nun sieglu

Fotografía histórica de gente caminando por Cangas del Narcea
Cangas del Narcea pierde la metá de población nun sieglu

L’éxodu rural y la crisis minera provoquen la emigración

Cangas del Narcea nun ye ayena a la sangría demográfica d’otres comarques. Algamó caltenese penriba de los 10.000 habitantes, pero nos últimos 20 años el conceyu perdió 4.000 vecinos. Sicasí, en comparación cola población contabilizada a entamos del sieglu XX, el descensu ye bien grande, pasando de más de 24.000 a los 12.579 qu’hai anguaño.

Dende los años 50, como en munches otres zones, entama’l descensu de población. L’éxodu rural, sicasí, foi menor que n’otros conceyos gracies a l’actividá minera, y la emigración compensó con trabayadores llegaos d’otres zones. Naquel momentu, instaláronse trabayadores mozos coles sos families y los colexos de la villa viéronse desbordaos.

Fueron años de muncha medría que camudaron la villa de Cangas del Narcea apaeciendo nuevos barrios. La capital del conceyu triplicó entós la so población, pero na zona rural namái medraron los pueblos con esplotaciones mineres cerca.

Munchos d’esos pueblos siguen siendo los que más población tienen. Aparte de la villa, que cuenta con unos 6.250 habitantes, anguaño namái media docena de los aproximadamente 300 núcleos qu’hai nel conceyu, superen el centenar de vecinos.

Décades dempués, el declive de la minería traxo una segunda fola d’emigración qu’entovía se caltién hasta anguaño. Nos años 90 baxa per primera vegada de los 20.000 habitantes.

Según los últimos datos, la población de Cangas del Narcea asítiase anguaño nos 12.579, de los que’l 28% tienen más de 65 años. Mientres, los menores de 18 suponen el 13%. En 2017, namái nacieron nel conceyu 60 neños, frente a los 178 del añu 90.

Dende’l 2000, Cangas del Narcea perdió cuasi 4.000 habitantes y pasó de ser el novenu conceyu más pobláu d’Asturies, a la decimocuarta posición.

Publicidad
Publicidad
Publicidad
banner publicidad

© 2024 Radiotelevisión del Principado de Asturias | Todos los derechos reservados

Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL