Carmita Pandiella, coleccionista de muñeques

Toles muñeques tienen un traxe únicu fechu con paciencia por Carmita

Carmita Pandiella amuesa arguyosa la so impresionante colección de muñeques nel negociu familiar qu'agora rexenten los sos fíos en Martimporra, Bimenes. Hai de porzolana y de plásticu, grandes y pequeñes, pero toos tienen un traxe únicu fechu cola paciencia y les sabies manes de Carmita.

Pandiella decidió, tres años faciendo dellos traxes rexonales en miniatura, dar un pasu más. Púnxose manes a la obra y, buciando na so infancia, vistió tres muñeques como si fueren ella y les sos amigues.

Si daqué-y gusta a esta artesana ye compartir esta colección y por eso esfrutó tanto cuando-y propunxeron esponer na Feria de l'Ascensión.

El problema col que s'enfrenta agora ye qu'esti tipu de muñeques tán descatalogaes, y nun ye fácil atopales. Internet, tiendes de segunda mano o particulares son los llugares a los que sigue diendo, cola mesma ilusión que'l primer día, Carmita Pandiella, pa siguir aumentando la so colección de muñeques.