Casu recupera la electricidá gracies a un xenerador, pero nun funcionen tolos servicios básicos

En Salinas entamen los llabores de reparación de los estrozos provocaos pola lluvia

Casu, unu de los conceyos más afectaos por esti últimu temporal, la borrasca, recuperó ayeri pela nuche la electricidá gracias a un xenerador.

Los vecinos viéronse afectaos pol apagón el día d’ayeri y agora vuelven poco a poco a recuperar la normalidá. Fueron 11 hores ensin lluz, nin telefonía móvil nin fixa, nin internet.

Enagora funciona la cobertura móvil pero entovía nun tienen en marcha telefonía fixa nin internet. Esto torga que nun puean funcionar servicios básicos como la distribución de recetes electróniques o los caxeros automáticos, que siguen inoperativos por mor d’esti problema.

Los vecinos dicen tar cansaos d’esta situación que se repite cada añu, "en cuantes caen cuatro trapos de ñeve".

L’alcalde del conceyu reclama reformes nel suministru eléctricu.

Entamen les reparaciones de los estrozos provocaos pola lluvia en Salinas

En Salinas foi una mañana intensa de trabayu, dempués de les inundaciones qu’inundaron decenes de cocheres. El ríu yá volvió al so calce y l’agua entamó a salir de trasteros y aparcamientos.

Con grúa ye como dalgunos vecinos tuvieron que sacar los sos coches. Nuna cochera de l’avenida del Campón seis coches quedaron inservibles y l’agua entovía nun se pudo sacar. Los ascensores siguen ensin funcionar y en dalgunos edificios tampoco tienen lluz nes zones comunes.

En Raíces los operarios eléctricos entamaron a sustituyir la torreta qu’ayeri cayó nes víes. Mientres, el ríu volvió al so calce y la carretera que comunica Raíces con Salinas yá foi reabierta al tráficu.