Celestino Menéndez vende les sos colleches nel mercáu de los domingos de Grau

Caltién la tradición nel so enfotu por perpetuar esti oficiu

Les llechugues, cebolles, repollos o fabes son productos de la güerta de Grau. Celestino Menéndez, conocíu como 'Tino' ye unu de los guardianes, más veteranos, d'un oficiu en peligru d'estinción. Defensor de la güerta de tola vida, planta coles sos granes, dalgunes con más de mediu sieglu d'antigüedá.

Les sos güertes tán allugaes nuna zona avezada de paséu de los moscones. Munchos faen un altu nel camín, pa faer negociu con Tino y llevar les sos hortolices pa casa.

A pesar del ésitu de les sos colleches, llamenta que los mozos nun valoren lo suficiente estos productos cultivaos de forma natural dafechu.

Mientres la salú lu acompañe, Tino va siguir dándo-y al picón. La so meyor medicina pa sumar años enllenos de vitalidá. Toa una vida, presumiendo de güerta. Una güerta que gracies al so enfotu ye, inda, daqué más qu'una imaxe na nuesa memoria.