Concentración en Xixón pa esixir una llei qu’acabe cola prostitución

N’Asturies, tres de cada 10 homes recurren a esti tipu de negociu

Cuasi un centenar de persones concentróse esti mediudía en Xixón pa esixir una llei qu’abole la prostitución n’España.

Una manifestación convocada poles asociaciones Muyeres Moces d’Asturies, Mil Voces Violetes, Rapiegues y pola Tertulia Feminista Les Comadres, y al que s’amestaron otros colectivos feministes.

Un actu qu’arrancó cola reproducción d’un discursu d’una ex-prostituta, Sonia Sánchez, y qu’acabó cola llectura d’un manifiestu en La Plaza Mayor, frente al Ayuntamientu. 

Tres de cada 10 homes recurren a la prostitución n'Asturies 

España ye, según los datos de la ONU, el mayor consumidor de prostitución d’Europa y unu de los mayores del mundu.

Solo n’Asturies tres de cada 10 homes recurren a un negociu d’esplotación que tien como protagonistes a les muyeres. Porque elles suponen el 98% de les persones prostituyíes n’España. Y a nivel mundial, una cuarta parte son neñes.

Estes muyeres, diz l’Asociación pa la Prevención, Reinserción y Atención a la Muyer Prostituyida, cuerren un riegu 40 vegaes mayor de ser asesinaes. Les más, víctimes d’agresiones físiques, amenaces y violaciones que tienen como resultáu un cuadru d’estrés postraumáticu.

Dende les asociaciones feministes, ponen el focu na industria del porno y na importancia d’una educación sexual cuasi ausente n’España.

Poro, nesta selmana na que se conmemoró’l Día Internacional escontra la Esplotación Sexual, esixen una llei d’abolición de la prostitución pa que muyeres y neñes dexen de ser oxetu de consumu.