Corte ente Curniana y La Espina pa dar solución a problemes técnicos

Los vecinos entamen a perder la paciencia

Esta tarde cortaráse la vía rápida ente Curniana y La Espina pa dar solución a unos problemes técnicos detectaos nún de los sos viaductos.

Mino Rodríguez tien 28 cabeces de ganáu nuna finca cerca del viaductu de l’autovía que cortarán nes hores vinientes. La so mayor esmolición ye, agora, saber cómo podrá atender al ganáu. Les alternatives que-y dan son llargues o, nel so casu, inservibles.

Son dos les carreteres afectaes por esti nuevu corte en Salas, la vía rápida de Curniana-La Espina y l’AS-370 que pasa per baxo y que xune la capital salense con Soutu los Infantes. Hai alternatives como l’usu de la vieya nacional o de caminos locales que van per pueblos como Aciana o Poules.

Los vecinos entamen a perder la paciencia. El tiempu estimáu del corte de la vía ye de cuatro selmanes. La ponte na que se detectó un fundimientu de 30 centímetros, que namás tien una década, tendrá que ser sustituyida dafechu.