Docentes de la concertada reivindiquen la equiparación salarial cola pública

N'Asturies les diferencies salariales puen llegar a los 13.000 euros al añu

Trabayadores de la enseñanza concertada protestaron esti vienres énte la sede del Gobiernu del Principáu en demanda de la equiparación retributiva colos docentes de la educación pública, yá que, según los sindicatos convocantes, pasaron quince años dende l'últimu alcuerdu pa la homologación de salarios.

Convocaos polos sindicatos OTECAS, USO Y FSIE, qu'ostenten el 80 por cientu de la representación sindical nel sector de la enseñanza concertada d'Asturies, cerca de mediu centenar de docentes reivindicaron un aumentu de los sos salarios, yá que "nun esperimentaron nengún tipu de xuba nel complementu autonómicu dende va quince años", sorrayó'l secretariu xeneral d'OTECAS, José Manuel Cueto.

El so homólogu n'USO, Gonzalo Menéndez, agradeció la voluntá amosada pola conseyera, Lydia Espina, nesti asuntu pero refugó que la medría salarial pa los docentes de la concertada tenga que negociase en paralelo colos conciertos d'Educación.