ENCE invertirá al rodiu de 100 millones d’euros na so planta de Navia

Un importante desembolsu onde destacarán les meyores en materia ambiental

ENCE invertirá al rodiu de 100 millones d’euros na so planta de Navia de cara a la so ampliación definitiva, na parada añal de mayu de 2019. Un importante desembolsu onde destacarán les meyores en materia ambiental.

Una llinia cola qu’ENCE caltién el máximu compromisu, según señaló güei’l director xeneral d’Operaciones de Celulosa y Enerxía, Jaime Argüelles, cumpliendo colos parámetros d’escelencia. Inversión que dexará medrar la producción de la papelera nun 15%, pasando de les 540.000 tonelaes d’anguaño a 620.000.

Esta mañana celebróse un alcuentru ente Jaime Argüelles y Fernando Lastra nel que s’avanzó la posibilidá de la construcción d’un nuevu emisariu pa desfacese de los residuos, y al que podríen xuntase los que lleguen de la depuradora de Navia y Cuaña. N’estudiu ta tamién la opción d’enganchar los de la planta de purín próxima a la papelera.

El Conseyeru d’Infraestructures amosó’l compromisu del Principáu por facer compatible’l calter industrial de la rexón, cola conservación del mediu ambiente. Dende’l Gobiernu del Principáu espérase pola recepción del estudiu encargáu a la Universidá Carlos III pal asitiamientu afayadizu de les unidaes de midida, motivu de polémica anguaño.