Webcams
Buscar
Actos conmemorativos del Día Internacional de la Muyer marcaos poles restricciones sanitaries
La pandemia del coronavirus obligó a llendar los actos conmemorativos del Día Internacional de la Muyer n'Asturies a pequeñes concentraciones en dellos conceyos y a actos telemáticos y simbólicos fechos por parte de les alministraciones, dexando atrás les manifestaciones multitudinaries de los últimos años énte les restricciones sanitaries impuestes.
N'Uviéu, alredor de 120 persones participaron esti mediudía na concentración convocada por UXT y CCOO na que reivindicaron la importancia de "lluchar con más fuerza que nunca" pa superar l'impactu que la pandemia del coronavirus ta teniendo sobro la igualdá de xéneru.
La Plaza d'España de la capital asturiana foi l'escenariu d'una concentración, marcada pola distancia social necesaria pa garantizar les midíes sanitaries, na que se llevaron pancartes col lema "Igualdá: más fechos, menos palabres" y "Vives, llibres, xuníes pola igualdá".
Les secretaries d'Igualdá d'UXT y CCOO d'Asturies, Carmen Escandón y Ana Rodríguez, respectivamente, fueron les encargaes de lleer un manifiestu nel que reclamaron la igualdá real ente homes y muyeres y la eliminación "de toles formes de discriminación y violencia pa coles muyeres".
Tamién na capital asturiana, decenes de moces axuntáronse a les 12:00 na Plaza de La Escandalera convocaes pol Sindicatu d'Estudiantes y Llibres y Combatives pa celebrar un día nel que, al so xuiciu, quixeron "criminalizar" el movimientu feminista.
El mesmu colectivu entamó esti mediudía otra concentración nos Xardinos del Náutico de Xixón na que participaron mediu centenar d'estudiantes, a quien se sumaron los pensionistes y les trabayadores del serviciu d'ayuda a casa y na que se vieron cartelos como "8 de marzu. Volvimos faer hestoria", y banderes arcu la vieya y trans.
El Gobiernu d'Asturies optó anguaño por nun promover nenguna celebración física, pa evitar riesgos pola situación de pandemia, y foi'l presidente, Adrián Barbón, quien, dende la sede del Principáu, allumáu dende ayeri de violeta, color simbólico del movimientu feminista, llanzó un mensaxe institucional p'animar a enllenar les redes sociales con reivindicaciones feministes.
"Esti 8 de marzu, el Gobiernu del Principáu afálavos a siguir la vuesa llucha por una Asturies feminista, pola meyor Asturies: la de la igualdá real", afirmó Barbón.
La delegada del Gobiernu n'Asturies, Delia Losa, tamién llanzó un mensaxe nel qu'afirmó que pal Executivu de Pedro Sánchez "tolos díes son 8 de marzu" porque "la causa de les muyeres ye la causa de tola humanidá".
Losa sorrayó que'l Gobiernu "avanza hacia una España feminista, comprometida cola promoción y protección de los derechos de les muyeres, la igualdá efectiva y les polítiques públiques que resuelvan les desigualdaes" que sufren les muyeres.
El Conceyu d'Uviéu celebró un actu institucional na casa consistorial nel que'l rexidor Alfredo Canteli afirmó que llegó'l momentu d'abordar "un cambéu decisivu, apostando pol desenvolvimientu de les persones independientemente del so sexu", porque ser muyer, sorrayó, "nun significa, de nenguna de les maneres, tar un pasu detrás" de los homes.
Nel salón de plenos, nel que se lleó'l manifiestu aprobáu nel Conseyu d'Igualdá del Conceyu por parte de delles integrantes del organismu, Canteli resaltó'l so "firme compromisu cola batalla de les muyeres, que tien que ser de toos".
En Xixón, tolos grupos municipales con representación nel Conceyu de Xixón, sacante Vox, aprobaron una declaración institucional en defensa de la plena igualdá de les muyeres, un colectivu que fixo un “esfuerzu pergrande” nos meses de pandemia.
N'Avilés, presentóse'l documental “Mujeres de Avilés en primera línea”, trabayu que reivindica la importancia de les muyeres como clave na crisis sanitaria de la covid-19 y nel que l'alcaldesa Mariví Monteserín asegura que, dende la llegada del coronavirus, el so enfotu foi llegar a les persones más perxudicaes pola pandemia.
Nesta villa tamién se dio la llectura d'un manifiestu ellaboráu pol Conseyu de la Muyer, qu'alvierte que la fienda salarial, que n'Asturies supón que les muyeres ganen sobre'l 29 por cientu menos que los homes, afecta tamién a les sos futures pensiones.
La xornada concluyó cola celebración de dos concentraciones, promovíes pol colectivu Asturies Feminista 8M, na cai Uría, d'Uviéu, y la Plaza L'Humedal, de Xixón, que xuntó a cientos de persones sol lema "Porque nós movemos el mundu. Poles que vienen" y que tuvieron un marcáu calter festivu.
