El Balneariu de Fontoria tuvo en funcionamientu hasta mediaos del sieglu XX

A pesar de les torgues pa entrar, sigue recoyéndose l'agua sulfuroso de los sos manantiales

Enagora ye prácticamente inaccesible, pero una vegada nel sitiu entá se ve l’esplendor qu’un día tuvo’l Balneariu de Fontoria, n’Allande.

Pocos saben, inclusiva na contornada, de la llamada Casa del Agua, a orielles d’El Ríu Arganza, n’Allande. Escondíu ente los árboles y arrodiáu de matos, entá son visibles los restos del edificiu que funcionó como balneariu d’agua sulfuroso hasta mediaos del sieglu XX.

Tres socios punxeron en marcha’l proyectu, inauguráu en 1888. El so éxitu ta afitáu na prensa de la dómina con tou tipu d’anuncios y referencies.

Cola Guerra Civil dexó d’agospiar a xente, pero siguió ufiertando los tratamientos. La so fama atrayía xente de toa España y dexó abrir delles fondes p’agospiar a los pacientes nos pueblos de la contornada y inclusive en cases particulares.

Dende mediaos del sieglu XX foi abandonándose, anque los que sabíen de la so existencia siguíen y siguen, a pesar de les torgues pa llegar, garrando agua.

Güei queda poco más que la cadarma, anque entá se ven parte de les sales de bañu na planta baxa y ente l’escombru los restos d’una de les bañeres. El pisu intermediu taba dedicáu a zones comunes con un gran corredor de madera, y la zona d’agospiu na planta d’arriba. Na otra oriella, la capiella de la Virxe de la Salú, a la que se diba per una ponte colgante.

Nes últimes décades hubo dalgunes propuestes p’aprovechar el so agua-melicinal y inclusive un estudiu hidrotermal encargáu en 2008 pol Ayuntamientu, pero, enagora, nun hai nengún plan pa recuperar l’espaciu.