El Centru Asturianu d'Hong Kong donó más de 10.000 mazcarines al Principáu

El material llegará a Asturies a finales d'esta selmana, según la Conseyería de Salú

El Centru Asturianu d'Hong Kong donó al Principáu 10.500 mazcarines como amuesa de solidaridá énte la crisis sanitaria motivada pol coronavirus, un material que llegará a la comunidá a finales d'esta selmana, informó la Conseyería de Salú.

El Serviciu de Salú del Principáu d'Asturies (SESPA) habilitó'l corréu electrónicu material.coronavirus@sespa.es pa canalizar toles iniciatives d’empreses, fundaciones, asociaciones y particulares que quieran donar material sanitario.

La Conseyería de Salú tamién fizo dellos pidíos de mazcarines de protección pa pacientes y profesionales sanitarios, si bien señaló que, enagora, cuenta con abondes existencies por mor de qu'esti material ta "racionalizándose en función de les necesidaes".

Sicasí, Salú prevé recibir tamién esta selmana los test rápidos de detección del nuevu coronavirus que s'entamarán a usar en profesionales sanitarios y usuarios y trabayadores de les residencies de mayores de la comunidá que presenten dalgún tipu de síntoma.

Según confirmó a Efe esti departamentu, en función del númberu que reciba'l Principáu estes pruebes podríen espardese, darréu, al restu de la población nunos puntos afitaos que'l Gobiernu asturianu asitiará pa poner en marcha estes pruebes.

Enagora, n'Asturies yá se ficieron cuasi 6.000 pruebes que, según cifres d'ayeri, rexistraron 662 contaxos pol COVID-19.