El Centru d’Enfermedaes Neurolóxiques de Llangréu entama a recibir afectaos

Asturies amplía la desinfección a toles residencies del ERA con positivos

El Centru de Referencia pa Persones con Discapacidaes Neurolóxiques (Credine) de Llangréu, habilitáu p’afrontar la crisis sanitaria pol nuevu coronavirus, recibió ayeri pela nueche a los tres primeros pacientes con COVID-19, que fueron derivaos dende hospitales y otros dispositivos sociosanitarios.

El centru, que tien 60 cuartos con bañu individual, acoyerá a persones positives del nuevu coronavirus que tean asintomátiques o presenten un estáu leve de la enfermedá y que, poles sos condiciones sociosanitaries, nun puean tar n’aisllamientu nes sos cases o en centros sanitarios.

Per otra parte, el Serviciu de Salú del Principáu d’Asturies (Sespa) xestionó’l serviciu de televisión de baldre nos hospitales públicos pa facer más llevadera la estancia de tolos pacientes ingresaos, que por mor de la pandemia nun puen recibir visites.

Dende güei, los usuarios nun necesitarán del usu de monedes p’activar les televisiones nos cuartos d’estos centros sanitarios, informa la Conseyería.

Asturies amplía la desinfección a toles residencies del ERA con positivos

El Gobiernu d’Asturies amplió los llabores de desinfección a toles residencies de la rede pública del ERA nes que se rexistraron casos positivos de COVID-19, pa facer frente al virus y garantizar dafechu la seguridá tanto de residentes como de profesionales.

La Conseyería de Derechos Sociales y Bienestar solicitó a la Unidá Militar d’Emerxencies (UME) que sofite estes xeres de desinfección nos centros residenciales destinaos a persones mayores del Principáu, qu’anguaño desendolca la empresa Tragsa.

Anguaño, les residencies nes que se rexistraron casos positivos nel ERA son siete, del total de 26 que xestiona l’organismu de forma directa: El Cristo, Grau, Palaciu d’El Villar, El Naranco, Morea, Santa Teresa y Clara Ferrer.

Los trabayos de llimpieza y hixenización centraránse esti llunes güei nel refuerzu de los llabores de desinfección nel esterior de la residencia de persones mayores Palaciu d’El Villar, en Castrillón, y nel centru de Santa Teresa d’Uviéu.

La selmana pasada desinfectáronse tolos espacios de les residencies de Grau y Palaciu d’El Villar y güei estos llabores ampliaránse a la residencia de Santa Teresa.

La conseyera de Derechos Sociales, Melania Álvarez, solliñó que’l Principáu ta "poniendo en marcha tolos recursos" disponibles "pa facer frente a la pandemia y protexer a los colectivos más vulnerables".

Nes residencies de persones mayores de la rede pública (ERA) llevóse alantre la selmana pasada un axuste de los servicios esenciales pa garantizar la seguridá de la plantiya y caltener el cuidáu a los residentes.

Como midida de prevención, los profesionales de fisioterapia, podoloxía, terapia ocupacional, animación sociocultural y psicoloxía nun vayan a les residencies, al nun considerase servicios esenciales, pero sí se reforzó l’asistencia sanitaria cola contratación d’enfermeres.

Na residencia de Grau, la plantiya avezada de cinco enfermeres amplióse hasta diecisiete.

El Principáu tresmitió a dellos centros la posibilidá de que les families de dalgunos residentes puean treslladar a les persones mayores que viven nestos centros a los sos llares na pandemia.

Ayeri, domingu, contabilizábense 95 positivos na rede de residencies del ERA, 73 residentes y 22 profesionales.