El Colexu d’Enfermería destinó 173.000 euros pa la compra de mazcarines
![Sanitarios aplaudiendo durante la crisis del Covid](https://www.rtpa.es/fotos//20/06/20200627200247_20200627enfermeria.jpg)
El presupuestu esti añu supera los dos millones d’euros
El Colexu Profesional d’Enfermería d’Asturies (Codepa) dedicó una partida presupuestaria de 173.000 euros pa la compra de 44.000 mazcarines pa los sanitarios por mor de la pandemia del coronavirus, una cuantía que s’algamó coles cuotes ordinaries de marzu y abril.
El colexu celebró esti sábadu la primer xunta xeneral del órganu profesional en más de cuatro años, na que se dio cuenta del balance económicu del exerciciu pasáu, cuando tuvo unos ingresos que xubieron a 2.075.463 euros y unos gastos de 1.402.508 euros, poro, el saldu positivu a final d’añu asitióse en 671.201 euros.
En cuantes al presupuestu del exerciciu en cursu, y por mor de la escepcionalidá de la pandemia del COVID-19, el Colexu d’Enfermería piensa nunos ingresos pa esti añu de 2.085.850 euros y un presupuestu de gastu non superior a 2.085.647 euros.
Dende l’órganu profesional destaquen l’alta participación de colexaos y la tresparencia cola que se desendolcó la xunta.