El Gobiernu asturianu ve nos cambeos de la variante un "erru históricu"

Belén Fernández califica de "mazazu al futuru económicu d'Asturies" el cambéu de criteriu

La conseyera d'Infraestructures, Ordenación del Territoriu y Mediu Ambiente, Belén Fernández, calificó güei de "disparate, erru históricu y mazazu al futuru económicu d'Asturies" el cambéu de criteriu del Gobiernu d'España sobre la variante de Payares.

El Ministeriu de Fomentu garantizó ayeri la llegada de l'alta velocidá ferroviaria a Asturies n'anchu internacional, anunció que los presupuestos de 2017 y los de siguientes exercicios "doten de los recursos necesarios pa esti fin", en cumplimientu del alcuerdu ente PP y Foro.

La llegada de l'alta velocidá a Asturies y la so puesta en serviciu n'anchu internacional va obligar tamién a invertir 145 millones nel caltenimientu y renovación integral de la llinia actual del puertu de Payares, pa que puean siguir pasando per ella los convóis de mercancíes.

Pa la titular asturiana d'infraestructures, el nuevu diseñu supón un "escandalosu despilfarru" de dineru público "porque en llugar d'optimizar una inversión de más de 3.000 millones, aprovechándola pa tolos tráficos d'entrada y salida a la meseta, lo que van facer ye desaprovechala, llindándola solo a viaxeros que representen menos, muncho menos, de la metá de los tráficos".

La conseyera tamién considera un despilfarru la inversión prevista de 145 millones pa "parchear" la vieya rampla de Payares, que, según recordó, "ta más qu'amortizada, lleva enforma tiempu ensin un caltenimientu integral".

"Tenela en serviciu, en precaries condiciones, va esixir inversiones constantes", afirmó en recordando que l'actual trazáu per Payares tien más de 130 años, y d'alvertir de que'l fechu de caltener dos infraestructures ferroviaries "va tener series consecuencies económiques".

La titular d'Infraestructures alvirtió de que la decisión del Gobiernu de Mariano Rajoy, que, a última hora, implica gastar más dineru público pa un serviciu ferroviariu muncho peor, va provocar más retrasos nuna obra "pola que lleven enforma tiempu clamando los asturianos".

Fernández sollertó sobre otros efectos del cambéu de criteriu de Fomentu, como que los vagones van siguir teniendo que ser más curtios y van portar cargues más pequeñes, torgando por exemplu tresportar pieces de gran tamañu o tarazando'l desarrollu del tresporte multimodal venceyáu a los puertos.

Amás, el trayectu de les mercancíes va ser más llargu, colo que se va consumir más tiempu y va encarecese'l porte.

"Al claudicar ante'l dañible pactu con Foro Asturies sobre la variante de Payares, el Gobiernu del PP espúlsanos de la rede básica transeuropea de tresportes, negándo-y a Asturies lo qu'Europa-y reconoz, que ye un corredor pa viaxeros y tamién pa mercancíes", afirmó.

Coles mesmes, conseñó, l'Executivu central desói la defensa en bloque del tráficu mestu por parte del Gobiernu d'Asturies, les organizaciones sociales y empresariales y delles formaciones polítiques.

"El Gobiernu va camín d'hipotecar el progresu económicu d'Asturies nel próximu sieglu, porque una infraestructura d'esti valir tien per delantre, polo menos, un sieglu de vida útil", dixo la conseyera que considera que too ye por mor de"la rindición de Rajoy al caprichu de Francisco Álvarez-Cascos".

Belén Fernández alvirtió tamién de que'l Gobiernu asturianu nun va quedar de brazos cruzaos ante "esa barbaridá" y va pidir que la xunta que pidió col ministru de Fomentu, Íñigo de la Serna, se celebre con calter d'urxencia.

Coles mesmes, anunció que va convocar la nueva alianza poles infraestructures pa esplicar la situación y promover qu'esti asuntu se lleve al Congresu pa que la variante tenga "tráficu mestu".